Öncə hamınızı səmimi qəlbdən slamlayır, sizlərin bu tədbirdə iştirakından məmin olduğumu bildirmək istətyirəm.
Müqəddəs Kitabımız Qurani-Kərimin «Nur» surəsinin ayeyi-şərifində buyurulur ki:
﴿...وَ مَن لم يجعل الله له نورا فما له من نور﴾
«Allah bir kəsə nur bəxş etməsə, onun nuru olmaz» (Nur, 40).
Biz elə bir şəxsiyyətin nuruna toplaşmışıq ki, onun haqqında illər ötsə də alimlərimiz, din xadimlərimiz,
siyasətçilərimiz, ümumən bəşəriyyətin bütün mütərəqqi və ziyalı insanları xoş sözlər danışacaq, unudulmaz xatirəsi
daima ürəklərimizdə yaşayacaqdır.
Bu şəxsiyyət milyonların qəlblərində əbədiyaşar olan dahi ümummilli liderimiz Heydər Əliyevdir.
Heydər Əliyevin ölkəmizdə dini etiqad azadlığının bərqərar olmasında, xalqımızın milli mənəvi dəyərlərinin
qorunmasında, dini dözümlülük ənənələrinin möhkəmləndirilməsində və dövlət-din münasibətlərinin inkişafında
müstəsna xidmətləri olmuşdur. Onun səyləri ilə ölkə həyatının bütün istiqamətlərində, eləcə də, milli-mənəvi
dəyərlərimizə münasibətdə yeni bir mərhələnin əsası qoyulub. Bu da öz növbəsində xalqımızın öz tarixinə sahib
çıxmasına böyük zəmin yaratmışdır. Ümummilli Liderimizin müdrik və uzaqgörən siyasəti nəticəsində xalqımız dini
ayinlərini sərbəst qeyd etməyə başlamış, şəhər və kəndlərimizdə yeni ibadətgahlar inşa edilmiş, biganəlikdən uçub
dağılmış müqəddəs ocaqlar bərpa olunmuşdur.
Heydər Əliyev xalqımızın gələcək taleyinin müəyyən mənada milli-mənəvi dəyərlərin qorunmasından asılı
olduğunu nəzərə alaraq deyirdi:
“Biz Azərbaycanlılar heç vaxt inamımızdan, dinimizdən uzaqlaşmayacaq və bu mənəvi mənbələrimizdən
istifadə edərək gələcəyimizi quracağıq”.
Heydər Əliyev siyasi fəaliyyəti dövründə bu prinsipləri əsas tutur, xalqımızın milli-mənəvi dəyərlərinin qorunmasına
çalışırdı.
Ulu öndərimiz Heydər Əliyev siyasi xadim kimi dünya miqyasında böyük ehtiram və nüfuza malik idi. Onun
məqsədyönlü daxili və xarici siyasəti beynəlxalq ictimaiyyət, o cümlədən müsəlman dünyası tərəfindən hər zaman
böyük rəğbətlə qarşılanırdı. H. Əliyev müstəqil Azərbaycanın dünya ölkələri ilə sıx əlaqələrini qurur, qarşılıqlı
əməkdaşlığa çalışırdı. Dünyanın siyasi liderləri, elm və din xadimləri yüksək siyasi və dövlətçilik keyfiyyətlərinə görə
Heydər Əliyevə həmişə böyük ehtiramla yanaşırdılar.
Mən dəfələrlə belə görüşlərin canlı şahidi olmuşam, hər dəfə Vətənimiz və millətimiz üçün fəxarət və qürur hissi
keçirmişəm.
Bu gün anadan olmasının 85 illiyini qeyd etməyimizlə bu dahi şəxsiyyətin saysız-hesabsız gözəl xatirələri və
əməllərini bir daha yada salır və inşallah, onları yaşadacağıq. Biz dindarlar Allaha şükürlər və həmd sənalar edirik ki,
ulu öndərimizin layiqli davamçısı, onun siyasi kursuna sadiq olan və ölkəmizi H.Əliyevin irs qoyduğu prinsiplərlə idarə
edən və inkişaf etdirən möhtərəm prezidentimiz - cənab İlham Əliyev var və atasının həqiqi varisi kimi daim qəlbi və
əməlləri ilə bizimlədir, xalqladır, millətlədir.
İlham Əliyev 2003-ci il Prezident seçkilərində qalib gəldikdən sonra Azərbaycanın regionun ən güclü
dövlətlərindən birinə çevrilməsi Heydər Əliyevin arzu və istəklərinin həyata keçməsidir. Möhtərəm prezidentimiz
İlham Əliyev yüksək bilik və bacarığı, dövlət idarəetmə məharəti ilə regionda vacib simalardan biri olduğunu
artıq sübut etmişdir. Ulu öndərimizin varislik ənənələrini davam etdirən bir şəxs kimi prezidentimiz cənab İlham Əliyev
xalqımızın milli-mənəvi dəyərlərini, dinlərarası tolerantlıq ənənələrini qoruyur və daim inkişaf etdirir. Onun siyasətində
dinimizə, mədəniyyətimizə, əxlaqi dəyərlərimizə böyük önəm verildiyi açıq-aydın hiss olunur. Bu da təbii ki, bizi çox
sevindirir, qürurlandırır və Prezidentimizin ətrafında daha möhkəm birləşməyə təşviq edir. Mən də öz dindarlarımızın
seçimi ilə fəxr edirəm. Onlar keçən seçkilərdə də həqiqi demokratik və müdrik siyasətə - İlham Əliyev cənablarına səs
verəcəklər.
Əziz mərasim iştirakçıları!
Bu gün biz əlamətdar bir tədbirdə - Asiya Müsəlmanları Komitəsinin sədri, Küveyt Dövlətinin Vəqflər və İslam İşləri
nazirinin müavini, Azərbaycan xalqının səmimi dostu doktor Adil əl-Fəlahın “Heydər Əliyev və milli-mənəvi dəyərlər”
kitabının təqdimat mərasiminə toplaşmışıq.
Ümummilli liderimiz Heydər Əliyevin həyatı, şəxsiyyəti, siyasi və ictimai fəaliyyət haqqında Azərbaycanda, eləcə
də xarici ölkələrdə bir çox qiymətli əsərlər yazılmışdır. Bu əsərlər əsasən ictimai və siyasi xadimlər, jurnalistlər və
ədiblər tərəfindən qələmə alınmışdır.
Çox əlamətdar haldır ki, onların arasında ilk dəfə dünyada tanınmış böyük alim, mötəqilliyin təbliğatçısı, məşhur
ictimaiyyətçi və din xadimi doktor Adil əl-Fəlahın “Heydər Əliyev və milli-mənəvi dəyərlər” kitabı bu gün işıq üzü görür.
Doktor Adil əl-Fəlahın dahi şəxsiyyət haqqında hazırladığı kitabını fərqləndirən əsas cəhətlərdən biri müəllifin Heydər
Əliyevin şəxsiyyətinə, həyat yoluna, siyasi fəaliyyətinə və fikirlərinə yaxindan bələdliyi, müxtəlif tədbirlərdə onunla
ünsiyyətdə olmasıdır.
Doktor Adil əl-Fəlah ölkəmiz müstəqillik əldə etdikdən sonra Azərbaycanı ilk dəstəkləyən şəxslərdən biridir.
Üzləşdiyimiz Qarabağ problemi ilə bağlı bizim mövqeyimizin müdafiəsi üçün çalışmış, qaçqın və məcburi
köçkünlərimizə Küveyt dövlətinin təmənnasız yardımlarını təşkil etmişdir. Zəngin həyat təcrübəsinə, yorulmaz
fəaliyyətinə, obyektiv fikir və mülahizələrə malik bir şəxs kimi doktor əl-Fəlah təkcə öz ölkəsində deyil, Azərbaycanda
da tanınan və sevilən insanlardandır. Geniş oxucu kütləsinə təqdim edilən bu əsərdə Heydər Əliyevin Qurani-Kərim və
İslam elmlərində dərin ehtiramı, müqəddəs ziyarətgahlara, dini fəlsəfi təmayüllərə sayğısı əksini tapır. İslam dininə
fanatizm, terrorizm damğası vurmağa cəhd edənlərə ulu öndərimizin barışmaz mövqeyi, tutarlı cavabları da bu
kitabda öz əksini tapır. Əsərin əhəmiyyətini artıran səbəblərdən biri də onun ərəbcə yazılması, azərbaycan, rus və
ingilis dillərinə tərcümə olunmasıdır və bu kitabla Heydər Əliyevin müdrik siyasətini, onun titanik fəaliyyətini təbliğ
etmək üçün bir daha geniş imkanlar açılır.
Ulu öndərimizin İslamı sülh dini kimi qiymətləndirilməsi bir tarixi həqiqətdir. Bu tarixi həqiqətə əsaslanaraq
İslam dünyası da hər zaman öz böyük oğlunu sevmiş və dəyərləndirmişdir. Küveyt dövlətinin və Asiya Müsəlmanları
Komitəsinin məsul rəsmilərindən olan, doktor Adil əl-Fəlahın yazdığı nəfis tərtibatlı bu kitab Heydər Əliyev şəxsiyyətində
Azərbaycan dövlətinin əzmini və qürurunu dünya çapında bir daha təsdiqləyir.
Ümidvaram ki, inşallah, “Heydər Əliyev və milli-mənəvi dəyərlər” kitabı Azərbaycanın, ərəb ölkələrinin, eləcə də
dünya xalqlarının böyük oxucu kütləsinin hörmət və rəğbətini qazanacaq, dahi şəxsiyyət Heydər Əliyevin əvəzsiz
xidmətlərinin və azərbaycançılıq ideyalarının təbliğində müstəsna rol oynayacaqdır.
Əminəm ki, bu dəyərli kitabın təqdimatında fəal iştirak edib, ürək sözlərini deyəcəksiniz.
Allah köməyiniz olsun!
