Qafqaz   Müsəlmanları   İdarəsi   Ermənistandan   bir   qrup   şəxsin   Azərbaycanın  işğal altında  olan ərazilərinə
nümayişkəranə  müdaxiləsini – «zəvvar» adı ilə Qarabağa – Şuşa  və Xankəndinə yürüş etməsini Qarabağ münaqişəsinə
aidiyyatı   olmadığını   iddia   edən   Ermənistan  dövlətinin  münaqişəsinin  həlli  məsələsində tutduğu  qeyri-konstruktiv
mövqenin bariz nümunəsi, aşkar göstəricisi kimi  qiymətləndirir.
          Dağlıq   Qarabağ   məsələsi   ortaya atılan andan etibarən, bu qondarma problemin dinc yolla həlli  üçün əlindən
gələni əsirgəməmiş, ermənilərin dini rəhbərləri  ilə  dəfələrlə  görüşlər keçirmiş, münaqişənin dini müstəviyə keçməməsi,
dini   çalar  kəsb   etməməsi  üçün  gərgin   səy  və  ardıcıl  fəaliyyət  göstərmiş  Qafqaz Müsəlmanları İdarəsi  öz mənəvi
haqqından çıxış edərək bəyan edir ki, Eçmiadzində əyləşənlər öz  soydaşlarını “İrəli, Ermənistan,  Allaha doğru” çağırışı
ilə xeyir-dua verərək, işğal  altında saxladıqları əzəli Azərbaycan torpaqlarına yönləndirməklə öz xalqını,  millətini sonu
görünməyən uçuruma sürükləyirlər. Biz təəssüf edirik ki,  Eçmiadzin rəhbərliyi əldə olunmuş razılaşmalarin ruhuna xilaf
çıxaraq,  münaqişənin sülh yolu ilə həll olunmasına yardımçı olmaq əvəzinə, onun daha da  dərinləşməsinə  rəvac verir.
Dini hisslərdən münaqişələrin, dini ədavətin  qızışdırılması vasitəsi kimi istifadə olunması qəti yolverilməzdir. Bu, erməni
Katolikosunun da iştirakçısı  olduğu  Dünya din  xadimlərinin  2006-cı ildə  Moskvada  keçirilmiş  Zirvə görüşünün Yekun
sənədində   də   öz   əksini   tapmışdır.  Din  xadimlərinin   bu  işdə  üzərlərinə  böyük  məsuliyyət düşür və xalqlarımızın,
millətlərimizin  sabahı  naminə  bunu dərk etmək lazımdır.
         Hesab   edirik   ki, din    və   dinlərarası    münasibətlər insanlar və xalqlar arasında nifaq deyil, qarşılıqlı  anlaşma
yaratmağa xidmət etməlidir. Dinlərarası   dialoqun  genişləndiyi,   dünya   dinlərinin   sülhyaratma   potensialından tam
istifadə olunması qayğısına  qalındığı, bu işə BMT səviyyəsində dəstək verildiyi bir    zamanda  erməni  din  xadimlərinin
fətvası ilə baş verən son olay isə təcavüz və işğala haqq  qazandırmaq anlamına xidmət edərək,  dialoqun inkişafına yer
qoymur; hərçənd ki,  problemin ən optimal həll yollarından biri dialoqdur.
         QMİ  olaraq   bu  aksiyaya  öz qəti  etirazımızı  bildirir, erməni   yürüş  iştirakçılarının Azərbaycan  tərəfinin razılığı
olmadan   dövlətimizin   ərazisinə   daxil olmasının   qeyri-qanuni  beynəlxalq normalara zidd  olduğunu  bəyan edir və
yürüşün dini çalar daşımasının  nə qədər acınacaqlı fəsadlara gətirib çıxara biləcəyi təhlükəsi ilə bağlı  ciddi  düşünməyi
erməni tərəfindən tələb edirik.