Qafqaz Müsəlmanları İdarəsinin sədri Şeyxülislam Allahşükür Paşazadə Türkiyə Diyanət İşləri başkanı Əli
Bardakoğlunun dəvəti ilə fevralın 25-dən 28-dək qardaş ölkədə səfərdə olmuşdur.
İki ölkə arasında dini-mənəvi əlaqələrin daha da inkişaf etdirilməsi məqsədi ilə gerçəkləşən bu səfərdə Allahşükür
Paşazadəni QMİ Elmi-Dini Şurasının sədri akademik Vasim Məmmədəliyev və Şeyxülislamın birinci müavini müfti
Salman Musayev müşayət etmişlər.
Fevralın 25-də A. Paşazadəni Türkiyə Prezidenti Abdulla Gül qəbul etmişdir. Görüşdə Azərbaycan və Türkiyə
arasında münasibətlərin inkişafında din xadimlərinin rolu, qardaş dövlətlərimizin bir-birnə qarşılıqlı yardım və dəstək
göstərməsi, Türkiyənin Diyanət işləri Bakanlığı ilə Qafqaz Müsəlmanları İdarəsi arasında əməkdaşlıq məsələləri,
gələcəkdə keçiriləcək birgə konfranslar barədə müzakirələr aparılmışdır.
Görüş zamanı Xocalı, 20 Yanvar faciələri xatırlanmış, bildirilmişdir ki, bu qətliamları dünya ictimaiyyətinin
diqqətinə çatdırmaq üçün dövlət və din xadimləri daha sıx əməkdaşlıq etməli, fəallıqlarını artırmalıdırlar.
Daha sonra Allahşükür Paşazadə Türkiyənin Diyanət işləri başkanı Əli Bardakoğlu ilə görüşmüşdür. Qardaş ölkənin
din xadimləri adından Şeyxülislama xatirə hədiyyəsi təqdim olumuşdur. İki ölkənin dini idarə başçıları ikitərəfli əlaqələr,
Avrasiya Dini Şurası çərçivəsində əməkdaşlıq, dindarların qarşılıqlı səfərləri ilə bağlı məsələləri müzakirə etmişlər.
Avrasiya Dini Şurasında işlərin təşkil olunmasında Allahşükür Paşazadənin 30 illik zəngin təcrübəsi yüksək
dəyərləndirilmiş, bu təcrübədən yararlanmaq zərurəti barədə danışılmışdır. Görüş zamanı ölkələrimizin dini tədris
müəssisələri arasında tələbə mübadiləsi məsələləri də müzakirə olunmuşdur. Ən başlıcası isə Allahşükür Paşazadə və Əli
Bardakoğlu erməni və PKK terroruna qarşı mübarizədə din xadimlərinin daha fəal olmalarının zəruriliyini
vurğulamışlar.
Allahşükür Paşazadə Ankaranın Kocatəpə məscidində PKK terrorçuları ilə döyüşlərdə həlak olmuş türk əsgərlərinin
cənazə namazında iştirak etmişdir.
Heydər Əliyev fondu və Azərbaycanın Türkiyədəki səfirliyinin Xocalı soyqırımının 16-cı ildönümü ilə bağlı Ankarada
keçirtdikləri tədbirlərdə iştirak edən QMİ sədri öz çıxışında Xocalı faciəsinin baş verdiyi ağır illəri xatırlamış, ermənilərin
qəddarlıqla qətlə yetirdikləri uşaqları öz əlləri ilə dəfn etdiyini söyləmişdir. Şeyxülislam vurğulamışdır ki, böyük
sarsıntılar keçirən Azərbaycan xalqı yalnız ulu öndər Heydər Əliyevin hakimiyyətə qayıdışından sonra birləşdi və gələcək
faciələrin qarşısı alındı. A. Paşazadə bildirmişdir ki, bu gün prezidentlər İlham Əliyev, Abdulla Gül və Baş Nazir Rəcəb
Tayyib Ərdoğanın qardaşlıq münasibətləri ermənilərə layiqli cavab vermək imkanı yaradır.
A. Paşazadə fevralın 26-da Ankaranın Batıkənd rayonundakı Heydər Əliyev parkına gəlmiş, ulu öndərin burada
ucaldılmış abidəsinin önünə əklil qoymuşdur. Şeyxülislam ümummilli liderimizin ruhuna dua oxumuşdur.
Həmin gün Türkiyənin Baş naziri Rəcəb Tayyib Ərdoğan Şeyxülislam A. Paşazadə ilə görüşmüşdür. Türkiyə
hökumətinin başçısı qardaş Azərbaycanın dini liderinin Türkiyəyə səfərindən məmun olduğunu bildirmiş, din
xadimlərinin xalqlar arasında dostluq əlaqələrinin möhkəmləndirilməsindəki rolunu yüksək qiymətləndirmişdir.
Xocalı qətliamı ilə bağlı daha qardaş Azərbaycan xalqına başsağlığı verən R. T. Ərdoğan, Şeyxülislamın PKK
terrorçuları ilə döyüşlərdə şəhid olmuş əsgərlərin cənazə namazında iştirak etməsindən məmunluğunu dilə gətirmişdir.
Türkiyə və Azərbaycanın dini idarələri arasında əlaqələrin yüksək səviyyədə olmasından məmunluğunu ifadə
edən Şeyxülislam A. Paşazadə bildirmişdir ki, rəhbərlik etdiyi Qafqaz Müsəlmanları İdarəsinin Qazilər və Elmi-Dini
şuraları Rəcəb Tayyib Ərdoğanın türkçülüyün dünya birliyinə uğurlu inteqrasiyası yönündə ardıcıl fəaliyyətinə, milli-
mənəvi dəyərlərimizin qorunması sahəsində böyük xidmətlərinə, «bir millət, iki dövlət» olan Türkiyə və Azərbaycan
arasında dostluq və qardaşlığın daha da möhkəmləndirilməsi işinə verdiyi töhfələrə görə «Şeyxülislam ordeni» ilə
təltif olunması barədə qərar çıxarmışdır. A. Paşazadə ordeni Türkiyə hökumətinin başçısına təqdim etmişdir.
Qafqaz Müsəlmanları İdarəsinin sədri Şeyxülislam A. Paşazadənin Ankaraya səfəri çərçivəsində Türkiyənin
dövlət nazirləri Mustafa Səid Yazıçıoğlu, Mehmet Aydınla görüşlərində də qardaş ölkələrimizin din xadimləri arasında
tələbə mübadiləsi, birgə dini nəşrlərin çap olunması və digər məsələlər müzakirə edilmişdir.
Səfər zamanı A. Paşazadənin Şeyxülislamlıq fəaliyyətini əks etdirən, nəfis şəkildə Türkiyədə nəşr olunmuş iri
həcmli, çoxsaylı fotoillüstrasiyaları olan albom-kitabın ilk nüsxələri təqdim olunmuşdur. Kitab Azərbaycan, rus və
ingilis dillərində nəşr olunmuşdur.
QMİ mətbuat xidməti
